fbpx

إيجابيات وسلبيات الاستثمار في صناديق الاستثمار

يعتبر الاستثمار في صندوق استثمار اختيار كويس عشان تبني محفظة متنوعة. ومع ذلك، قبل ما تستثمر في صندوق مهم انك تكون فاهم الايجابيات والسلبيات اللي بيقدمها الصندوق. في المقالة دي هنشوف بتفصيل إيجابيات وسلبيات الاستثمار في صندوق، جاهز؟

ليه صناديق الاستثمار فرصة ذهبية؟

الاستثمار مع محترف

 تعتبر صناديق الاستثمار اختيار ممتاز لو انت بتستثمر لاول مرة، لانك هتتجنب انك تشارك في متاعب إدارة محفظتك واختيار الأسهم المناسبة للشراء وده معناه أن عندهم معرفة كبيرة وعملوا بحث مكثف عشان يحوطوا استراتيجية تشتغل لصالحك.

التنويع

 التنويع قاعدة اساسية لما تبدأ استثمار لأنه بيقلل بشكل كبير من المخاطر عن طريق ضم استثمارات مختلفة داخل المحفظة. لما تشتري في صندوق استثمار، فإنت كده بتنوع محفظتك بشكل سهل وسريع لان الصناديق الاستثمارية بتستثمر في أشكال مختلفة من الاستثمارات في صناعات مختلفة. وده أسهل من انك تشتري كل سهم لوحده وتحاول تنوع محفظتك.

السيولة 

السيولة هي انك تقدر تحول الأصل إلى فلوس نقدية. ميزة صناديق الاستثمار بشكل عام هي السيولة العالية مقارنة بالمنتجات الاستثمارية التانية زي الشهادات البنكية، وده منتج بيحتفظ بمبلغ ثابت لمدة محددة مقابل فايدة

ولكن لازم تفضل الفلوس اللي انت حاطتها في الشهادة زي ما هي طول المدة عشان لو فكيت الفلوس فانت كده بتخاطر انك تخسر الفايدة، وده بيخلي الشهادات البنكية اختيار استثماري بسيولة قليلة. وبما أنك تقدر تسحب فلوسك من صندوق استثمار في فترة زمنية قصيرة (يوميًا أو أسبوعيًا) ، فعشان كده يعتبر استثمار عالي السيولة

الاستثمار السلبي

صناديق الاستثمار بتديك فرصة التمتع بمميزات الاستثمار السلبي. يعني ايه استثمار سلبي اصلا؟ ده عبارة عن إستراتيجية استثمار تتضمن عمليات شراء وبيع أقل أو بمعني آخر ده فكر يتضمن انك تشتري وتحتفظ بالاسهم لتحقيق مكاسب علي المدي الطويل. من أمثلة الاستثمار السلبي هي صناديق الاستثمار، لكن خلي بالك مش كل الصناديق بتتبع الاستراتيجية دي. هي بتنطبق بس علي الصناديق اللي بتتبع مؤشر زي الEGX30  .

ايه هي العيوب المحتملة؟

الفرص الضايعة 

مش محتاجين نقول أن الاستثمار في صندوق بيساعدك على تنويع محفظتك وتقليل المخاطر. ولكن ده بردو ممكن يمنعك انك تعمل أرباح كبيرة لان التنويع بيقلل من المخاطر وبالتالي بيقلل بشكل كبير من العائد. وعشان كده لو سعر سهم معين زاد هتفضل مرتبط باستثمارك النسبي في الصندوق. بمعنى آخر، ده بيقلل من أرباحك. خلينا نفترض أنك حطيت 1000 جنيه في صندوق استثمار بيستثمر في أسهم مختلفة ومن ضمنهم أسهم جهينة. وصاحبك اشترى في نفس الوقت أسهم جهينة بقيمة 1000 جنيه.

لو سعر سهم جهينة زاد بشكل كبير فالعائد اللي هتعمله من هذا السهم هيكون أقل بكثير من صاحبك اللي استثمر الفلوس كلها في السهم ده. وبردو لو سعر السهم قل، فهتكون خسارتك أقل من صاحبك اللي استثمر بالكامل في أسهم جهينة. زي ما بتقول القاعدة المشهورة: كل ما زادت المخاطرة، زادت الأرباح والعكس صحيح.

رسوم مدير الأصول

عشان انت بتشتري في صندوق بيديره مدير اصول محترف، فبتحتاج تدفع رسوم تشغيل سنوية تُعرف باسم نسبة المصروفات. الرسوم دي بتكون نسبة من الصندوق تتراوح بين 1-3٪.

الخلاصة

بعد ما فهمت إيجابيات وسلبيات صندوق الاستثمار، فالخطوة الجاية هي اختيار صندوق الاستثمار، طيب ازاي؟ الموضوع بسيط، تقدر تشوف المقالة دي عن ازاي تختار الصندوق المناسب. 

هذه المعلومات للأغراض التعليمية فقط وليست توصية أو دعوة للاستثمار. يمكن أن ترتفع قيمة الاستثمارات وتنخفض وتنطوي على مخاطر. لا تقدم ثاندر توصيات استثمارية ويجب على المستثمرين الأفراد اتخاذ قراراتهم الخاصة بناءً على أبحاثهم أو السعي للحصول على إرشادات مستقلة. ثاندر هو الاسم التجاري لشركة ثاندر للسمسرة في الأوراق المالية المرخصة والمنظمة من قبل هيئة الرقابة المالية (FRA). مسجلة في مصر (برقم 804).