fbpx

أنواع الأوامر: سعر السوق ولّا سعر محدد

في صباح يوم مشرق جميل، قرر أخوك ينزل السوق ويشتري شوية حاجات، وأنت عايزه يشتريلك معاه 5 كيلو لحمة، وقدامك طريقة من اتنين علشان تحدد له يشتري ازاي، يأما يشتري 5 كيلو لحمة بأي سعر يلاقيه (بس المهم الكمية)، يأما يشتري بمبلغ معين مايزيدش عنه بغض النظر عن الكمية.

نفس الموضوع بالظبط بيحصل في البورصة، بمعنى إنك لما تيجي تعمل أمر شراء  بيكون قدامك الاختيار ما بين طريقتين شراء، واحدة اسمها شراء بسعر السوق، والتانية اسمها شراء بسعر محدد، تعالى نشرح الموضوع ده بالتفصيل.

الشراء بسعر السوق: الفورية أهم من زيادة السعر

الشراء بسعر السوق بيشوف الفورية أهم من السعر الزيادة، وده معناه إن طلبك بيتم تنفيذه حالاً، بغض النظر عن سعر السهم، يعني التنفيذ بيحصل على أفضل سعر متاح في السوق، ودي الطريقة اللي عادة المستثمرين بيستخدموها لما يكونوا عايزين يبيعوا أو يشتروا أسهم حالاً. 

يعني على سبيل المثال، لو انت عايز تشتري 200 سهم دلوقتي حالاً، والناس اللي جاية تبيع السهم ده عارضينه بـ20 جنيه (وده اللي اسمه العرض)، وفي ناس تانية عايزة تشتريه بـ18 جنيه (وده اللي اسمه الطلب)، وبعدين يجي عاطف صاحبك اللي عايز يبيع 100 من نفس السهم ده، على السعر المعروض اللي هو 20 جنيه للسهم.

فساعتها لو انت سجلت طلب الشراء بتاعك للـ200 سهم على سعر السوق، اللي هيحصل هو ان نص طلبك هيتنفذ حالاً على 20 جنيه للسهم (لأن فيه بايع هنا اللي هو عاطف عارض السعر ده)، والنص التاني (اللي هو الـ100 سهم الباقيين) هيتنفذوا على سعر السوق. اللي هو ممكن يتراوح ما بين 25 جنيه لـ18 جنيه، الموضوع بيعتمد على السوق نفسه، يعني باختصار، انت مش مضطر تشتري الـ200 سهم كلهم بنفس السعر طالما طلبك متسجل على سعر السوق.

السعر المحدد: السعر أهم من الفورية

الشراء بسعر محدد بيتعامل مع السعر على أساس أنه أهم من الفورية، بمعنى أنك مش عايز تشتري دلوقتي حالاً على قد ما انت مهتم بسعر معين، فاللي هيحصل انك هتحدد السعر اللي انت عايز تبيع أو تشتري بيه سهم (اياً كان هو سهم أنهي شركة) الموضوع كأنه التعليمات بتاعتك اللي بتحطها لشراء أو بيع سهم معين.

أمر الشراء بسعر محدد

خلينا نقول أنك عايز تشتري سهم يبقى سعره 10 جنيه، فهتقوم عامل طلب شراء محدد بالسعر اللي انت عايزه، كأنك بالظبط بتوجه الـsystem أو النظام أنه ينفذ طلبك بحد أقصى للسعر (أو أقل) بالرغم أنه سعر السوق الحالي 15 جنيه للسهم.

 وبالتالي طلبك مش هيتم تنفيذه إلا لما سعر السهم يوصل لـ10 جنيه أو أقل، وساعتها بس هيتم تنفيذ طلبك.

أمر البيع بسعر محدد

ودلوقتي لو هنتطبق نفس المثال اللي قولناه على أوامر الشراء بسعر محدد، على أمر البيع بسعر محدد، هنقول أن انت دلوقتي بتمتلك أسهم، وعايز تبيع السهم الواحد بـ20 جنيه، فانت كدة برضه بتوّجه الـsystem انه ينفذ طلبك للبيع على 20 جنيه للسهم كأقل سعر (أو أكتر) وده بيكون معروف باسم عمل طلب بيع بسعر محدد. وبكدة طلبك مش هيتنفذ إلا لما يكون في مستثمر موافق على السعر ده كحد أدنى للشراء.

طب ايه اللي هيحصل لو السوق نفسه ما وصلش للسعر اللي انت طالبه؟ ولا حاجة، بمنتهى البساطة كل اللي هيحصل أنه مش هيتم تنفيذ طلبك، سواء بالبيع أو الشراء طالما السوق ما وصلش للسعر اللي انت حددته.

يعني كدة هيفضل الطلب بتاعي قيد الانتظار مدى الحياة؟

 لا، مش بالظبط كده، خلينا نوضح نقطة، انه لما بتيجي تعمل طلب شراء أو بيع بسعر محدد بيكون عندك 3 اختيارات: 

الاختيار #1: صالح حتى الإلغاء

معنى صالح حتى الإلغاء انه الطلب بتاعك بيفضل موجود (أو فعّال) لحد ما يتنفذ أو تلغيه انت بنفسك.

الاختيار #2: صالح حتى يوم

 وده معناه أن طلبك بيفضل فعّال لحد نهاية اليوم، أو بمعنى أدق، بيفضل فعّل لحد نهاية “جلسة التداول”، إلا لو تم إلغائه أو خلاص اتنفذ.

الاختيار #3: صالح حتى تاريخ محدد

ببساطة ده معناه أن الطلب بيفضل فعّال لحد تاريخ معين، اللي انت بتحدده بشكل مسبق.

وبعكس الطلبات بسعر السوق، هنلاقي الطلبات بسعر محدد ممكن يتم إلغاؤها في أي وقت. 

الخلاصة:

فهمني طلبات بسعر السوق طلبات بسعر محدد
ايه هي؟ الأمر بيتنفذ حالاً، على احسن سعر الأمر بيتنفذ أول ما يلاقي سعر يتوافق مع اللي انت حددته
بلغيها ازاي؟ مفيش إمكانية لإلغاؤه ممكن تلغيه عادي
امتى اعمله؟ في أي وقت، وبيتنفذ في خلال مواعيد البورصة. في أي وقت، وبيتنفذ في خلال مواعيد البورصة.
5/5 - (1 صوت واحد)
هذه المعلومات للأغراض التعليمية فقط وليست توصية أو دعوة للاستثمار. يمكن أن ترتفع قيمة الاستثمارات وتنخفض وتنطوي على مخاطر. لا تقدم ثاندر توصيات استثمارية ويجب على المستثمرين الأفراد اتخاذ قراراتهم الخاصة بناءً على أبحاثهم أو السعي للحصول على إرشادات مستقلة. ثاندر هو الاسم التجاري لشركة ثاندر للسمسرة في الأوراق المالية المرخصة والمنظمة من قبل هيئة الرقابة المالية (FRA). مسجلة في مصر (برقم 804).